әскери бөлімнің жауынгерлік туы

әскери бөлімнің жауынгерлік мұратының, тарихы мен сіңірген еңбегінің ерекшеліктерін айқындайтын, сондай-ақ оның ҚР Қарулы Күштеріне жататынын көрсететін айрықша құрметті белгі. Ә.б.ж.т. жауынгерлік абырой, ерлік пен данқ нышаны болып табылады және әрбір әскери қызметшіге Отанымыздың ерлік дәстүрлері мен оны қорғау жөніндегі қасиетті борышын еске салу үшін қызмет етеді. Жауынгерлік Туды әскери бөлімдерге олар құрылған кезде ҚР Президентінің атынан ҚР Қорғаныс министрлігінің өкілдері тапсырады. Жауынгерлік Ту әскери бөлімнің атауы мен нөмірінің өзгеруіне қарамастан, әскери бөлімде біржола сақталады және Жауынгерлік Ту тапсырылған кезде берілетін ҚР Президентінің Грамотасына енгізіледі. Жауынгерлік Ту әрдайым өз әскери бөлімімен бірге, ал майдан даласында бөлімнің соғыс қимылдары ауданында болады. Әскери бөлімнің күллі жеке құрамы соғыс кезінде Жауынгерлік Туды жанқиярлықпен және ерлікпен қорғауға әрі оны дұшпандарының қолына түсірмеуге міндетті. Жауынгерлік Ту жоғалған жағдайда, мұндай абыройсыздыққа тікелей кінәлі әскери бөлімнің командирі мен әскери қызметшілер сотқа тартылуға, ал әскери бөлім таратылуға тиіс. Кемеде көтерілген ҚР Әскери-Теңіз Туы кеменің Жауынгерлік Туы болып табылады және оның мемлекеттік тиесілілігі мен оған қол сұғылмаушылықты бейнелейді.